פסוקים על Baruch

40 פסוקים · 3 היבטים

פסוקי מפתח

יִרְמְיָהוּ ל״ב:י״ב
ואתן את הספר המקנה אל ברוך בן נריה בן מחסיה לעיני חנמאל דדי ולעיני העדים הכתבים בספר המקנה לעיני כל היהודים הישבים בחצר המטרה׃
יִרְמְיָהוּ ל״ב:י״ג
ואצוה את ברוך לעיניהם לאמר׃
יִרְמְיָהוּ ל״ב:י״ד
כה אמר יהוה צבאות אלהי ישראל לקוח את הספרים האלה את ספר המקנה הזה ואת החתום ואת ספר הגלוי הזה ונתתם בכלי חרש למען יעמדו ימים רבים׃
יִרְמְיָהוּ ל״ב:ט״ו
כי כה אמר יהוה צבאות אלהי ישראל עוד יקנו בתים ושדות וכרמים בארץ הזאת׃
יִרְמְיָהוּ ל״ב:ט״ז
ואתפלל אל יהוה אחרי תתי את ספר המקנה אל ברוך בן נריה לאמר׃
יִרְמְיָהוּ ל״ו:ד׳
ויקרא ירמיהו את ברוך בן נריה ויכתב ברוך מפי ירמיהו את כל דברי יהוה אשר דבר אליו על מגלת ספר׃
יִרְמְיָהוּ ל״ו:ה׳
ויצוה ירמיהו את ברוך לאמר אני עצור לא אוכל לבוא בית יהוה׃
יִרְמְיָהוּ ל״ו:ו׳
ובאת אתה וקראת במגלה אשר כתבת מפי את דברי יהוה באזני העם בית יהוה ביום צום וגם באזני כל יהודה הבאים מעריהם תקראם׃
יִרְמְיָהוּ ל״ו:ז׳
אולי תפל תחנתם לפני יהוה וישבו איש מדרכו הרעה כי גדול האף והחמה אשר דבר יהוה אל העם הזה׃
יִרְמְיָהוּ ל״ו:ח׳
ויעש ברוך בן נריה ככל אשר צוהו ירמיהו הנביא לקרא בספר דברי יהוה בית יהוה׃
יִרְמְיָהוּ ל״ו:ט׳
ויהי בשנה החמשית ליהויקים בן יאשיהו מלך יהודה בחדש התשעי קראו צום לפני יהוה כל העם בירושלם וכל העם הבאים מערי יהודה בירושלם׃
יִרְמְיָהוּ ל״ו:י׳
ויקרא ברוך בספר את דברי ירמיהו בית יהוה בלשכת גמריהו בן שפן הספר בחצר העליון פתח שער בית יהוה החדש באזני כל העם׃
יִרְמְיָהוּ ל״ו:י״א
וישמע מכיהו בן גמריהו בן שפן את כל דברי יהוה מעל הספר׃
יִרְמְיָהוּ ל״ו:י״ב
וירד בית המלך על לשכת הספר והנה שם כל השרים יושבים אלישמע הספר ודליהו בן שמעיהו ואלנתן בן עכבור וגמריהו בן שפן וצדקיהו בן חנניהו וכל השרים׃
יִרְמְיָהוּ ל״ו:י״ג
ויגד להם מכיהו את כל הדברים אשר שמע בקרא ברוך בספר באזני העם׃
יִרְמְיָהוּ ל״ו:י״ד
וישלחו כל השרים אל ברוך את יהודי בן נתניהו בן שלמיהו בן כושי לאמר המגלה אשר קראת בה באזני העם קחנה בידך ולך ויקח ברוך בן נריהו את המגלה בידו ויבא אליהם׃
יִרְמְיָהוּ ל״ו:ט״ו
ויאמרו אליו שב נא וקראנה באזנינו ויקרא ברוך באזניהם׃
יִרְמְיָהוּ ל״ו:ט״ז
ויהי כשמעם את כל הדברים פחדו איש אל רעהו ויאמרו אל ברוך הגיד נגיד למלך את כל הדברים האלה׃
יִרְמְיָהוּ ל״ו:י״ז
ואת ברוך שאלו לאמר הגד נא לנו איך כתבת את כל הדברים האלה מפיו׃
יִרְמְיָהוּ ל״ו:י״ח
ויאמר להם ברוך מפיו יקרא אלי את כל הדברים האלה ואני כתב על הספר בדיו׃
יִרְמְיָהוּ ל״ו:י״ט
ויאמרו השרים אל ברוך לך הסתר אתה וירמיהו ואיש אל ידע איפה אתם׃
יִרְמְיָהוּ ל״ו:כ׳
ויבאו אל המלך חצרה ואת המגלה הפקדו בלשכת אלישמע הספר ויגידו באזני המלך את כל הדברים׃
יִרְמְיָהוּ ל״ו:כ״א
וישלח המלך את יהודי לקחת את המגלה ויקחה מלשכת אלישמע הספר ויקראה יהודי באזני המלך ובאזני כל השרים העמדים מעל המלך׃
יִרְמְיָהוּ ל״ו:כ״ב
והמלך יושב בית החרף בחדש התשיעי ואת האח לפניו מבערת׃
יִרְמְיָהוּ ל״ו:כ״ג
ויהי כקרוא יהודי שלש דלתות וארבעה יקרעה בתער הספר והשלך אל האש אשר אל האח עד תם כל המגלה על האש אשר על האח׃

מציג 1–25 מתוך 40 פסוקים

1 2 הבא