עברית

תְהִלִּים צ״ח

ניצחון האלוהים וישועה לכל א׳–ג׳

א׳
מזמור שירו ליהוה שיר חדש כי נפלאות עשה הושיעה לו ימינו וזרוע קדשו׃
ב׳
הודיע יהוה ישועתו לעיני הגוים גלה צדקתו׃
ג׳
זכר חסדו ואמונתו לבית ישראל ראו כל אפסי ארץ את ישועת אלהינו׃

קריאה לכל הבריאה להלל ולעבוד ד׳–ו׳

ד׳
הריעו ליהוה כל הארץ פצחו ורננו וזמרו׃
ה׳
זמרו ליהוה בכנור בכנור וקול זמרה׃
ו׳
בחצצרות וקול שופר הריעו לפני המלך יהוה׃

הבריאה מצפה למשפט המלך ז׳–ט׳

ז׳
ירעם הים ומלאו תבל וישבי בה׃
ח׳
נהרות ימחאו כף יחד הרים ירננו׃
ט׳
לפני יהוה כי בא לשפט הארץ ישפט תבל בצדק ועמים במישרים׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל