תְהִלִּיםקמ״ז

קריאה להלל את האל הרחום

א׳
הללו יה כי טוב זמרה אלהינו כי נעים נאוה תהלה׃
ב׳
בונה ירושלם יהוה נדחי ישראל יכנס׃
ג׳
הרפא לשבורי לב ומחבש לעצבותם׃
ד׳
מונה מספר לכוכבים לכלם שמות יקרא׃
ה׳
גדול אדונינו ורב כח לתבונתו אין מספר׃
ו׳
מעודד ענוים יהוה משפיל רשעים עדי ארץ׃

הלל על פרנסת האל בטבע

ז׳
ענו ליהוה בתודה זמרו לאלהינו בכנור׃
ח׳
המכסה שמים בעבים המכין לארץ מטר המצמיח הרים חציר׃
ט׳
נותן לבהמה לחמה לבני ערב אשר יקראו׃
י׳
לא בגבורת הסוס יחפץ לא בשוקי האיש ירצה׃
י״א
רוצה יהוה את יראיו את המיחלים לחסדו׃

ציון מהללת את האל על ביטחונה ועל תורתו

י״ב
שבחי ירושלם את יהוה הללי אלהיך ציון׃
י״ג
כי חזק בריחי שעריך ברך בניך בקרבך׃
י״ד
השם גבולך שלום חלב חטים ישביעך׃
ט״ו
השלח אמרתו ארץ עד מהרה ירוץ דברו׃
ט״ז
הנתן שלג כצמר כפור כאפר יפזר׃
י״ז
משליך קרחו כפתים לפני קרתו מי יעמד׃
י״ח
ישלח דברו וימסם ישב רוחו יזלו מים׃
י״ט
מגיד דברו ליעקב חקיו ומשפטיו לישראל׃
כ׳
לא עשה כן לכל גוי ומשפטים בל ידעום הללו יה׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options