תְהִלִּים ט׳:א׳-י׳

א׳

¶ למנצח עלמות לבן מזמור לדוד אודה יהוה בכל לבי אספרה כל נפלאותיך׃

ב׳

אשמחה ואעלצה בך אזמרה שמך עליון׃

ג׳

בשוב אויבי אחור יכשלו ויאבדו מפניך׃

ד׳

כי עשית משפטי ודיני ישבת לכסא שופט צדק׃

ה׳

גערת גוים אבדת רשע שמם מחית לעולם ועד׃

ו׳

האויב תמו חרבות לנצח וערים נתשת אבד זכרם המה׃

ז׳

ויהוה לעולם ישב כונן למשפט כסאו׃

ח׳

והוא ישפט תבל בצדק ידין לאמים במישרים׃

ט׳

ויהי יהוה משגב לדך משגב לעתות בצרה׃

י׳

ויבטחו בך יודעי שמך כי לא עזבת דרשיך יהוה׃