בְּמִדְבַּר ל״ג:א׳-ז׳

א׳

¶ אלה מסעי בני ישראל אשר יצאו מארץ מצרים לצבאתם ביד משה ואהרן׃

ב׳

ויכתב משה את מוצאיהם למסעיהם על פי יהוה ואלה מסעיהם למוצאיהם׃

ג׳

ויסעו מרעמסס בחדש הראשון בחמשה עשר יום לחדש הראשון ממחרת הפסח יצאו בני ישראל ביד רמה לעיני כל מצרים׃

ד׳

ומצרים מקברים את אשר הכה יהוה בהם כל בכור ובאלהיהם עשה יהוה שפטים׃

ה׳

ויסעו בני ישראל מרעמסס ויחנו בסכת׃

ו׳

ויסעו מסכת ויחנו באתם אשר בקצה המדבר׃

ז׳

ויסעו מאתם וישב על פי החירת אשר על פני בעל צפון ויחנו לפני מגדל׃