נַחוּם ג׳:י״ב-י״ט

י״ב

כל מבצריך תאנים עם בכורים אם ינועו ונפלו על פי אוכל׃

י״ג

הנה עמך נשים בקרבך לאיביך פתוח נפתחו שערי ארצך אכלה אש בריחיך׃

י״ד

מי מצור שאבי לך חזקי מבצריך באי בטיט ורמסי בחמר החזיקי מלבן׃

ט״ו

שם תאכלך אש תכריתך חרב תאכלך כילק התכבד כילק התכבדי כארבה׃

ט״ז

הרבית רכליך מכוכבי השמים ילק פשט ויעף׃

י״ז

מנזריך כארבה וטפסריך כגוב גבי החונים בגדרות ביום קרה שמש זרחה ונודד ולא נודע מקומו אים׃

י״ח

נמו רעיך מלך אשור ישכנו אדיריך נפשו עמך על ההרים ואין מקבץ׃

י״ט

אין כהה לשברך נחלה מכתך כל שמעי שמעך תקעו כף עליך כי על מי לא עברה רעתך תמיד׃