אֵיכָה ג׳:ז׳-ל״א
ז׳
גדר בעדי ולא אצא הכביד נחשתי׃
ח׳
גם כי אזעק ואשוע שתם תפלתי׃
ט׳
גדר דרכי בגזית נתיבתי עוה׃
י׳
דב ארב הוא לי אריה במסתרים׃
י״א
דרכי סורר ויפשחני שמני שמם׃
י״ב
דרך קשתו ויציבני כמטרא לחץ׃
י״ג
הביא בכליותי בני אשפתו׃
י״ד
הייתי שחק לכל עמי נגינתם כל היום׃
ט״ו
השביעני במרורים הרוני לענה׃
ט״ז
ויגרס בחצץ שני הכפישני באפר׃
י״ז
ותזנח משלום נפשי נשיתי טובה׃
י״ח
ואמר אבד נצחי ותוחלתי מיהוה׃
י״ט
זכר עניי ומרודי לענה וראש׃
כ׳
זכור תזכור ותשיח עלי נפשי׃
כ״א
זאת אשיב אל לבי על כן אוחיל׃
כ״ב
חסדי יהוה כי לא תמנו כי לא כלו רחמיו׃
כ״ג
חדשים לבקרים רבה אמונתך׃
כ״ד
חלקי יהוה אמרה נפשי על כן אוחיל לו׃
כ״ה
טוב יהוה לקוו לנפש תדרשנו׃
כ״ו
טוב ויחיל ודומם לתשועת יהוה׃
כ״ז
טוב לגבר כי ישא על בנעוריו׃
כ״ח
ישב בדד וידם כי נטל עליו׃
כ״ט
יתן בעפר פיהו אולי יש תקוה׃
ל׳
יתן למכהו לחי ישבע בחרפה׃
ל״א
כי לא יזנח לעולם אדני׃
Settings