שֹׁפְטִים ט׳:ל״ד-מ׳

ל״ד

ויקם אבימלך וכל העם אשר עמו לילה ויארבו על שכם ארבעה ראשים׃

ל״ה

ויצא געל בן עבד ויעמד פתח שער העיר ויקם אבימלך והעם אשר אתו מן המארב׃

ל״ו

וירא געל את העם ויאמר אל זבל הנה עם יורד מראשי ההרים ויאמר אליו זבל את צל ההרים אתה ראה כאנשים׃

ל״ז

ויסף עוד געל לדבר ויאמר הנה עם יורדים מעם טבור הארץ וראש אחד בא מדרך אלון מעוננים׃

ל״ח

ויאמר אליו זבל איה אפוא פיך אשר תאמר מי אבימלך כי נעבדנו הלא זה העם אשר מאסתה בו צא נא עתה והלחם בו׃

ל״ט

ויצא געל לפני בעלי שכם וילחם באבימלך׃

מ׳

וירדפהו אבימלך וינס מפניו ויפלו חללים רבים עד פתח השער׃