TRV
יְשַׁעְיָהוּ מ״ג:א׳-ז׳
א׳
¶ ועתה כה אמר יהוה בראך יעקב ויצרך ישראל אל תירא כי גאלתיך קראתי בשמך לי אתה׃
ב׳
כי תעבר במים אתך אני ובנהרות לא ישטפוך כי תלך במו אש לא תכוה ולהבה לא תבער בך׃
ג׳
כי אני יהוה אלהיך קדוש ישראל מושיעך נתתי כפרך מצרים כוש וסבא תחתיך׃
ד׳
מאשר יקרת בעיני נכבדת ואני אהבתיך ואתן אדם תחתיך ולאמים תחת נפשך׃
ה׳
אל תירא כי אתך אני ממזרח אביא זרעך וממערב אקבצך׃
ו׳
אמר לצפון תני ולתימן אל תכלאי הביאי בני מרחוק ובנותי מקצה הארץ׃
ז׳
כל הנקרא בשמי ולכבודי בראתיו יצרתיו אף עשיתיו׃
Settings