בְּרֵאשִׁית כ״ט:כ״ג-ל״א

כ״ג

ויהי בערב ויקח את לאה בתו ויבא אתה אליו ויבא אליה׃

כ״ד

ויתן לבן לה את זלפה שפחתו ללאה בתו שפחה׃

כ״ה

ויהי בבקר והנה הוא לאה ויאמר אל לבן מה זאת עשית לי הלא ברחל עבדתי עמך ולמה רמיתני׃

כ״ו

ויאמר לבן לא יעשה כן במקומנו לתת הצעירה לפני הבכירה׃

כ״ז

מלא שבע זאת ונתנה לך גם את זאת בעבדה אשר תעבד עמדי עוד שבע שנים אחרות׃

כ״ח

ויעש יעקב כן וימלא שבע זאת ויתן לו את רחל בתו לו לאשה׃

כ״ט

ויתן לבן לרחל בתו את בלהה שפחתו לה לשפחה׃

ל׳

ויבא גם אל רחל ויאהב גם את רחל מלאה ויעבד עמו עוד שבע שנים אחרות׃

ל״א

וירא יהוה כי שנואה לאה ויפתח את רחמה ורחל עקרה׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל