אהלה, היא שומרון, וניאופיה באשור

יְחֶזְקֵאל כ״ג:ה׳-י׳

ה׳

ותזן אהלה תחתי ותעגב על מאהביה אל אשור קרובים׃

ו׳

לבשי תכלת פחות וסגנים בחורי חמד כלם פרשים רכבי סוסים׃

ז׳

ותתן תזנותיה עליהם מבחר בני אשור כלם ובכל אשר עגבה בכל גלוליהם נטמאה׃

ח׳

ואת תזנותיה ממצרים לא עזבה כי אותה שכבו בנעוריה והמה עשו דדי בתוליה וישפכו תזנותם עליה׃

ט׳

לכן נתתיה ביד מאהביה ביד בני אשור אשר עגבה עליהם׃

י׳

המה גלו ערותה בניה ובנותיה לקחו ואותה בחרב הרגו ותהי שם לנשים ושפוטים עשו בה׃