יְחֶזְקֵאל כ׳:מ״א-מ״ט

מ״א

בריח ניחח ארצה אתכם בהוציאי אתכם מן העמים וקבצתי אתכם מן הארצות אשר נפצתם בם ונקדשתי בכם לעיני הגוים׃

מ״ב

וידעתם כי אני יהוה בהביאי אתכם אל אדמת ישראל אל הארץ אשר נשאתי את ידי לתת אותה לאבותיכם׃

מ״ג

וזכרתם שם את דרכיכם ואת כל עלילותיכם אשר נטמאתם בם ונקטתם בפניכם בכל רעותיכם אשר עשיתם׃

מ״ד

וידעתם כי אני יהוה בעשותי אתכם למען שמי לא כדרכיכם הרעים וכעלילותיכם הנשחתות בית ישראל נאם אדני יהוה׃

מ״ה

ויהי דבר יהוה אלי לאמר׃

מ״ו

בן אדם שים פניך דרך תימנה והטף אל דרום והנבא אל יער השדה נגב׃

מ״ז

ואמרת ליער הנגב שמע דבר יהוה כה אמר אדני יהוה הנני מצית בך אש ואכלה בך כל עץ לח וכל עץ יבש לא תכבה להבת שלהבת ונצרבו בה כל פנים מנגב צפונה׃

מ״ח

וראו כל בשר כי אני יהוה בערתיה לא תכבה׃

מ״ט

ואמר אהה אדני יהוה המה אמרים לי הלא ממשל משלים הוא׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל