TRV
שְׁמֹות י״ב:כ״ט-ל״ו
כ״ט
ויהי בחצי הלילה ויהוה הכה כל בכור בארץ מצרים מבכר פרעה הישב על כסאו עד בכור השבי אשר בבית הבור וכל בכור בהמה׃
ל׳
ויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשר אין שם מת׃
ל״א
ויקרא למשה ולאהרן לילה ויאמר קומו צאו מתוך עמי גם אתם גם בני ישראל ולכו עבדו את יהוה כדברכם׃
ל״ב
גם צאנכם גם בקרכם קחו כאשר דברתם ולכו וברכתם גם אתי׃
ל״ג
ותחזק מצרים על העם למהר לשלחם מן הארץ כי אמרו כלנו מתים׃
ל״ד
וישא העם את בצקו טרם יחמץ משארתם צררת בשמלתם על שכמם׃
ל״ה
ובני ישראל עשו כדבר משה וישאלו ממצרים כלי כסף וכלי זהב ושמלת׃
ל״ו
ויהוה נתן את חן העם בעיני מצרים וישאלום וינצלו את מצרים׃
Settings