המערכה הראשונה נגד עמון וארם

2 שְׁמוּאֵל י׳:ו׳-י״ד

ו׳

ויראו בני עמון כי נבאשו בדוד וישלחו בני עמון וישכרו את ארם בית רחוב ואת ארם צובא עשרים אלף רגלי ואת מלך מעכה אלף איש ואיש טוב שנים עשר אלף איש׃

ז׳

וישמע דוד וישלח את יואב ואת כל הצבא הגברים׃

ח׳

ויצאו בני עמון ויערכו מלחמה פתח השער וארם צובא ורחוב ואיש טוב ומעכה לבדם בשדה׃

ט׳

וירא יואב כי היתה אליו פני המלחמה מפנים ומאחור ויבחר מכל בחורי בישראל ויערך לקראת ארם׃

י׳

ואת יתר העם נתן ביד אבשי אחיו ויערך לקראת בני עמון׃

י״א

ויאמר אם תחזק ארם ממני והיתה לי לישועה ואם בני עמון יחזקו ממך והלכתי להושיע לך׃

י״ב

חזק ונתחזק בעד עמנו ובעד ערי אלהינו ויהוה יעשה הטוב בעיניו׃

י״ג

ויגש יואב והעם אשר עמו למלחמה בארם וינסו מפניו׃

י״ד

ובני עמון ראו כי נס ארם וינסו מפני אבישי ויבאו העיר וישב יואב מעל בני עמון ויבא ירושלם׃