Kuɗin Almajirci

Luka 14:25-35

Kuɗin Almajirci

Taron mutane mai yawa suna tafiya tare da Yesu, sai ya juya ya ce musu,

“Duk wanda yakan zo wurina, amma bai ƙi mahaifinsa da mahaifiyarsa, da matarsa da ’ya’yansa, da ’yan’uwansa mata da maza, kai, har ma ransa ba, ba zai iya zama almajirina ba.

Kuma duk wanda ba yakan ɗauki gicciyensa ya bi ni ba, ba zai iya zama almajirina ba.

“In wani daga cikinku yana so ya gina gidan sama, ai, yakan fara zama ne, ya yi lissafin abin da ginin zai ci tukuna, don yă ga ko yana da isashen kuɗi da zai gama ginin.

Gama in ya sa tushen gini, amma bai iya gamawa ba, duk wanda ya gani zai yi masa ba’a,

yana cewa, ‘Wannan mutum ya fara gini, amma bai iya gamawa ba.’

“Ko kuma, wane sarki ne, in zai je yaƙi da wani sarki, ai, yakan fara zama ne, ya duba ya ga, ko da mutane dubu goma, shi zai iya ƙarawa da mai zuwa da dubu ashirin?

In ba zai iya ba, to, tun suna nesa, zai aika da wakilai, su je neman sharuɗan salama.

Haka nan fa, kowane ne a cikinku, da ba ya rabu da abin da yake da shi ba, ba zai iya zama almajirina ba.

“Gishiri fa yana da kyau, amma in gishiri ya rabu da daɗin ɗanɗanonsa, ta yaya za a sāke mai da daɗin ɗanɗanonsa?

Ba shi da wani amfani, ko ga ƙasa, ko ga juji, sai dai a zubar da shi. “Duk mai kunnen ji, yă ji.”

Karanta Dukan Babi 14

Duba kuma

Sauran wuraren da Nassi ya faɗi haka

Mattiyu 10:37
“Duk wanda ya fi ƙaunar mahaifinsa ko mahaifiyarsa fiye da ni, bai dace yă zama nawa ba; duk kuwa wanda yake ƙaunar ɗansa ko diyarsa fiye da ni, bai dace yă zama nawa ba;
daga aya ta 26
Yohanna 12:25
Duk mai ƙaunar ransa, zai rasa shi, duk mai ƙin ransa a wannan duniya, zai kiyaye shi har yă zuwa rai madawwami.
daga aya ta 26
Karin Magana 24:27
Ka gama aikinka ka kuma shirya gonakinka; bayan haka, ka gina gidanka.
daga aya ta 28
Filibbiyawa 3:8
Me kuma ya fi, na ɗauki dukan abubuwa hasara ne in aka kwatanta da mafificiyar girman sanin Kiristi Yesu Ubangijina, wanda saboda shi ne na yi hasarar kome. Na mai da su kayan wofi, domin in sami Kiristi
daga aya ta 26
Ayyukan Manzanni 20:24
Amma ni ban ɗauki raina a bakin kome ba, in dai zan iya gama tserena in kuma kammala aikin da Ubangiji Yesu ya ba ni aikin shaida bisharar alherin Allah.
daga aya ta 26
Zabura 73:25
Wa nake da shi a sama in ba kai ba? Ba na kuma sha’awar kome a duniya in ban da kai.
daga aya ta 26
Zabura 73:26
Jikina da zuciyata za su iya raunana, amma Allah ne ƙarfin zuciyata da kuma rabona har abada.
daga aya ta 26
Filibbiyawa 3:7
Amma abin da dā ya zama mini riba yanzu, na ɗauka hasara ce saboda Kiristi.
daga aya ta 33
Ru’uya ta Yohanna 12:11
Sun ci nasara a kansa ta wurin jinin Ɗan Ragon da ta wurin kalmar shaidarsu; ba su ƙaunaci rayukansu sosai har da za su ja da baya daga mutuwa.
daga aya ta 26
1 Yohanna 2:15
Kada ku ƙaunaci duniya, ko wani abin da yake cikinta. In wani yana ƙaunar duniya, ƙaunar Uba ba ta cikinsa.
daga aya ta 33
1 Yohanna 2:16
Gama duk abin da yake na duniya, kamar sha’awace-sha’awacen mutuntaka, sha’awar idanunsa, da kuma taƙama da abin da yake da shi, yake kuma yi, ba daga wurin Uba suke fitowa ba sai dai daga duniya.
daga aya ta 33
Mattiyu 10:38
duk wanda kuma bai ɗauki gicciyensa ya bi ni ba, bai dace yă zama nawa ba.
daga aya ta 27

Inda wannan ya faru

All Luke Sites (Jerusalem) View full PDF

Jesus' Final Return to Jerusalem in the Synoptic Gospels View full PDF

Kuɗin Almajirci