פסוקים על Jaazaniah

13 פסוקים · 4 היבטים

פסוקי מפתח

  1. יְחֶזְקֵאל י״א:א׳

    ¶ ותשא אתי רוח ותבא אתי אל שער בית יהוה הקדמוני הפונה קדימה והנה בפתח השער עשרים וחמשה איש ואראה בתוכם את יאזניה בן עזר ואת פלטיהו בן בניהו שרי העם׃

  2. יְחֶזְקֵאל י״א:ב׳

    ויאמר אלי בן אדם אלה האנשים החשבים און והיעצים עצת רע בעיר הזאת׃

  3. יְחֶזְקֵאל י״א:ג׳

    האמרים לא בקרוב בנות בתים היא הסיר ואנחנו הבשר׃

  4. יְחֶזְקֵאל י״א:ד׳

    לכן הנבא עליהם הנבא בן אדם׃

  5. יְחֶזְקֵאל י״א:ה׳

    ותפל עלי רוח יהוה ויאמר אלי אמר כה אמר יהוה כן אמרתם בית ישראל ומעלות רוחכם אני ידעתיה׃

  6. יְחֶזְקֵאל י״א:ו׳

    הרביתם חלליכם בעיר הזאת ומלאתם חוצתיה חלל׃

  7. יְחֶזְקֵאל י״א:ז׳

    לכן כה אמר אדני יהוה חלליכם אשר שמתם בתוכה המה הבשר והיא הסיר ואתכם הוציא מתוכה׃

  8. יְחֶזְקֵאל י״א:ח׳

    חרב יראתם וחרב אביא עליכם נאם אדני יהוה׃

  9. יְחֶזְקֵאל י״א:ט׳

    והוצאתי אתכם מתוכה ונתתי אתכם ביד זרים ועשיתי בכם שפטים׃

  10. יְחֶזְקֵאל י״א:י׳

    בחרב תפלו על גבול ישראל אשפוט אתכם וידעתם כי אני יהוה׃

  11. יְחֶזְקֵאל י״א:י״א

    היא לא תהיה לכם לסיר ואתם תהיו בתוכה לבשר אל גבול ישראל אשפט אתכם׃

  12. יְחֶזְקֵאל י״א:י״ב

    וידעתם כי אני יהוה אשר בחקי לא הלכתם ומשפטי לא עשיתם וכמשפטי הגוים אשר סביבותיכם עשיתם׃

  13. יְחֶזְקֵאל י״א:י״ג

    ויהי כהנבאי ופלטיהו בן בניה מת ואפל על פני ואזעק קול גדול ואמר אהה אדני יהוה כלה אתה עשה את שארית ישראל׃