Kiswahili

Zaburi 47

Mwito wa Kuabudu kwa Mataifa Yote 1–4

1
Kwa mwimbishaji. Zaburi ya wana wa Kora. Pigeni makofi, enyi mataifa yote, mpigieni Mungu kelele za shangwe!
2
Jinsi gani alivyo wa kutisha, Bwana Aliye Juu Sana, Mfalme mkuu juu ya dunia yote!
3
Ametiisha mataifa chini yetu watu wengi chini ya miguu yetu.
4
Alituchagulia urithi wetu, fahari ya Yakobo, aliyempenda.

Kupaa kwa Mungu kwa Ushindi 5–7

5
Mungu amepaa kwa kelele za shangwe, Bwana kwa sauti za tarumbeta.
6
Mwimbieni Mungu sifa, imbeni sifa, mwimbieni sifa Mfalme wetu, imbeni sifa.
7
Kwa kuwa Mungu ni mfalme wa dunia yote, mwimbieni zaburi za sifa.

BWANA Anatawala Juu ya Mataifa Yote 8–9

8
Mungu anatawala juu ya mataifa, Mungu ameketi juu ya kiti chake cha enzi kitakatifu.
9
Wakuu wa mataifa wanakusanyika kama watu wa Mungu wa Abrahamu, kwa kuwa wafalme wa dunia ni mali ya Mungu; yeye ametukuka sana.

Maandiko ya Biblia: Biblica® Open Kiswahili Contemporary Version (Neno: Bibilia Takatifu)™, © 1984, 1989, 2009, 2015 Biblica, Inc. · CC BY-SA 4.0“Biblica” is a trademark registered in the United States Patent and Trademark Office by Biblica, Inc., used with permission.