עברית

תְהִלִּים ל״ו

רשעת הרשעים א׳–ד׳

א׳
למנצח לעבד יהוה לדוד נאם פשע לרשע בקרב לבי אין פחד אלהים לנגד עיניו׃
ב׳
כי החליק אליו בעיניו למצא עונו לשנא׃
ג׳
דברי פיו און ומרמה חדל להשכיל להיטיב׃
ד׳
און יחשב על משכבו יתיצב על דרך לא טוב רע לא ימאס׃

עצמת מידותיו של האל ה׳–ט׳

ה׳
יהוה בהשמים חסדך אמונתך עד שחקים׃
ו׳
צדקתך כהררי אל משפטך תהום רבה אדם ובהמה תושיע יהוה׃
ז׳
מה יקר חסדך אלהים ובני אדם בצל כנפיך יחסיון׃
ח׳
ירוין מדשן ביתך ונחל עדניך תשקם׃
ט׳
כי עמך מקור חיים באורך נראה אור׃

תפילה להגנה וביטחון במשפט י׳–י״ב

י׳
משך חסדך לידעיך וצדקתך לישרי לב׃
י״א
אל תבואני רגל גאוה ויד רשעים אל תנדני׃
י״ב
שם נפלו פעלי און דחו ולא יכלו קום׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל