עברית

תְהִלִּים קי״ב

אשרי יראי ה׳ א׳–ג׳

א׳
הללו יה אשרי איש ירא את יהוה במצותיו חפץ מאד׃
ב׳
גבור בארץ יהיה זרעו דור ישרים יברך׃
ג׳
הון ועשר בביתו וצדקתו עמדת לעד׃

מידותיו של האיש הרחום ד׳–ה׳

ד׳
זרח בחשך אור לישרים חנון ורחום וצדיק׃
ה׳
טוב איש חונן ומלוה יכלכל דבריו במשפט׃

בִּטְחוֹן הַצַּדִּיק וְגוֹרַל הָרְשָׁעִים ו׳–י׳

ו׳
כי לעולם לא ימוט לזכר עולם יהיה צדיק׃
ז׳
משמועה רעה לא יירא נכון לבו בטח ביהוה׃
ח׳
סמוך לבו לא יירא עד אשר יראה בצריו׃
ט׳
פזר נתן לאביונים צדקתו עמדת לעד קרנו תרום בכבוד׃
י׳
רשע יראה וכעס שניו יחרק ונמס תאות רשעים תאבד׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל