תְהִלִּים ק״ג:ט׳-י״ח

ט׳

לא לנצח יריב ולא לעולם יטור׃

י׳

לא כחטאינו עשה לנו ולא כעונתינו גמל עלינו׃

י״א

כי כגבה שמים על הארץ גבר חסדו על יראיו׃

י״ב

כרחק מזרח ממערב הרחיק ממנו את פשעינו׃

י״ג

כרחם אב על בנים רחם יהוה על יראיו׃

י״ד

כי הוא ידע יצרנו זכור כי עפר אנחנו׃

ט״ו

אנוש כחציר ימיו כציץ השדה כן יציץ׃

ט״ז

כי רוח עברה בו ואיננו ולא יכירנו עוד מקומו׃

י״ז

וחסד יהוה מעולם ועד עולם על יראיו וצדקתו לבני בנים׃

י״ח

לשמרי בריתו ולזכרי פקדיו לעשותם׃