בְּמִדְבַּר ט״ז:כ״ח-ל״ה

כ״ח

ויאמר משה בזאת תדעון כי יהוה שלחני לעשות את כל המעשים האלה כי לא מלבי׃

כ״ט

אם כמות כל האדם ימתון אלה ופקדת כל האדם יפקד עליהם לא יהוה שלחני׃

ל׳

ואם בריאה יברא יהוה ופצתה האדמה את פיה ובלעה אתם ואת כל אשר להם וירדו חיים שאלה וידעתם כי נאצו האנשים האלה את יהוה׃

ל״א

ויהי ככלתו לדבר את כל הדברים האלה ותבקע האדמה אשר תחתיהם׃

ל״ב

ותפתח הארץ את פיה ותבלע אתם ואת בתיהם ואת כל האדם אשר לקרח ואת כל הרכוש׃

ל״ג

וירדו הם וכל אשר להם חיים שאלה ותכס עליהם הארץ ויאבדו מתוך הקהל׃

ל״ד

וכל ישראל אשר סביבתיהם נסו לקלם כי אמרו פן תבלענו הארץ׃

ל״ה

ואש יצאה מאת יהוה ותאכל את החמשים ומאתים איש מקריבי הקטרת׃