הוראות לשבעת ימי המילואים

וַיִּקְרָא ח׳:ל״א-ל״ו

ל״א

ויאמר משה אל אהרן ואל בניו בשלו את הבשר פתח אהל מועד ושם תאכלו אתו ואת הלחם אשר בסל המלאים כאשר צויתי לאמר אהרן ובניו יאכלהו׃

ל״ב

והנותר בבשר ובלחם באש תשרפו׃

ל״ג

ומפתח אהל מועד לא תצאו שבעת ימים עד יום מלאת ימי מלאיכם כי שבעת ימים ימלא את ידכם׃

ל״ד

כאשר עשה ביום הזה צוה יהוה לעשת לכפר עליכם׃

ל״ה

ופתח אהל מועד תשבו יומם ולילה שבעת ימים ושמרתם את משמרת יהוה ולא תמותו כי כן צויתי׃

ל״ו

ויעש אהרן ובניו את כל הדברים אשר צוה יהוה ביד משה׃