נבואה על גוג מארץ המגוג

יְחֶזְקֵאל ל״ח:א׳-ז׳

א׳

¶ ויהי דבר יהוה אלי לאמר׃

ב׳

בן אדם שים פניך אל גוג ארץ המגוג נשיא ראש משך ותבל והנבא עליו׃

ג׳

ואמרת כה אמר אדני יהוה הנני אליך גוג נשיא ראש משך ותבל׃

ד׳

ושובבתיך ונתתי חחים בלחייך והוצאתי אותך ואת כל חילך סוסים ופרשים לבשי מכלול כלם קהל רב צנה ומגן תפשי חרבות כלם׃

ה׳

פרס כוש ופוט אתם כלם מגן וכובע׃

ו׳

גמר וכל אגפיה בית תוגרמה ירכתי צפון ואת כל אגפיו עמים רבים אתך׃

ז׳

הכן והכן לך אתה וכל קהלך הנקהלים עליך והיית להם למשמר׃