שְׁמֹות כ״ח:א׳-ה׳

א׳

¶ ואתה הקרב אליך את אהרן אחיך ואת בניו אתו מתוך בני ישראל לכהנו לי אהרן נדב ואביהוא אלעזר ואיתמר בני אהרן׃

ב׳

ועשית בגדי קדש לאהרן אחיך לכבוד ולתפארת׃

ג׳

ואתה תדבר אל כל חכמי לב אשר מלאתיו רוח חכמה ועשו את בגדי אהרן לקדשו לכהנו לי׃

ד׳

ואלה הבגדים אשר יעשו חשן ואפוד ומעיל וכתנת תשבץ מצנפת ואבנט ועשו בגדי קדש לאהרן אחיך ולבניו לכהנו לי׃

ה׳

והם יקחו את הזהב ואת התכלת ואת הארגמן ואת תולעת השני ואת השש׃