גְּבוּלוֹת, עֵדִים וּמִשְׁפַּט צֶדֶק
י״ד
לא תסיג גבול רעך אשר גבלו ראשנים בנחלתך אשר תנחל בארץ אשר יהוה אלהיך נתן לך לרשתה׃
ט״ו
לא יקום עד אחד באיש לכל עון ולכל חטאת בכל חטא אשר יחטא על פי שני עדים או על פי שלשה עדים יקום דבר׃
ט״ז
כי יקום עד חמס באיש לענות בו סרה׃
י״ז
ועמדו שני האנשים אשר להם הריב לפני יהוה לפני הכהנים והשפטים אשר יהיו בימים ההם׃
י״ח
ודרשו השפטים היטב והנה עד שקר העד שקר ענה באחיו׃
י״ט
ועשיתם לו כאשר זמם לעשות לאחיו ובערת הרע מקרבך׃
כ׳
והנשארים ישמעו ויראו ולא יספו לעשות עוד כדבר הרע הזה בקרבך׃
כ״א
ולא תחוס עינך נפש בנפש עין בעין שן בשן יד ביד רגל ברגל׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל