דְּבָרִים א׳:כ״א-כ״ט
כ״א
ראה נתן יהוה אלהיך לפניך את הארץ עלה רש כאשר דבר יהוה אלהי אבתיך לך אל תירא ואל תחת׃
כ״ב
ותקרבון אלי כלכם ותאמרו נשלחה אנשים לפנינו ויחפרו לנו את הארץ וישבו אתנו דבר את הדרך אשר נעלה בה ואת הערים אשר נבא אליהן׃
כ״ג
וייטב בעיני הדבר ואקח מכם שנים עשר אנשים איש אחד לשבט׃
כ״ד
ויפנו ויעלו ההרה ויבאו עד נחל אשכל וירגלו אתה׃
כ״ה
ויקחו בידם מפרי הארץ ויורדו אלינו וישבו אתנו דבר ויאמרו טובה הארץ אשר יהוה אלהינו נתן לנו׃
כ״ו
ולא אביתם לעלת ותמרו את פי יהוה אלהיכם׃
כ״ז
ותרגנו באהליכם ותאמרו בשנאת יהוה אתנו הוציאנו מארץ מצרים לתת אתנו ביד האמרי להשמידנו׃
כ״ח
אנה אנחנו עלים אחינו המסו את לבבנו לאמר עם גדול ורם ממנו ערים גדלת ובצורת בשמים וגם בני ענקים ראינו שם׃
כ״ט
ואמר אלכם לא תערצון ולא תיראון מהם׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל