דוד מסדר את רצח אוריה

י״ד

ויהי בבקר ויכתב דוד ספר אל יואב וישלח ביד אוריה׃

ט״ו

ויכתב בספר לאמר הבו את אוריה אל מול פני המלחמה החזקה ושבתם מאחריו ונכה ומת׃

ט״ז

ויהי בשמור יואב אל העיר ויתן את אוריה אל המקום אשר ידע כי אנשי חיל שם׃

י״ז

ויצאו אנשי העיר וילחמו את יואב ויפל מן העם מעבדי דוד וימת גם אוריה החתי׃

י״ח

וישלח יואב ויגד לדוד את כל דברי המלחמה׃

י״ט

ויצו את המלאך לאמר ככלותך את כל דברי המלחמה לדבר אל המלך׃

כ׳

והיה אם תעלה חמת המלך ואמר לך מדוע נגשתם אל העיר להלחם הלוא ידעתם את אשר ירו מעל החומה׃

כ״א

מי הכה את אבימלך בן ירבשת הלוא אשה השליכה עליו פלח רכב מעל החומה וימת בתבץ למה נגשתם אל החומה ואמרת גם עבדך אוריה החתי מת׃

כ״ב

וילך המלאך ויבא ויגד לדוד את כל אשר שלחו יואב׃

כ״ג

ויאמר המלאך אל דוד כי גברו עלינו האנשים ויצאו אלינו השדה ונהיה עליהם עד פתח השער׃

כ״ד

ויראו המוראים אל עבדך מעל החומה וימותו מעבדי המלך וגם עבדך אוריה החתי מת׃

כ״ה

ויאמר דוד אל המלאך כה תאמר אל יואב אל ירע בעיניך את הדבר הזה כי כזה וכזה תאכל החרב החזק מלחמתך אל העיר והרסה וחזקהו׃