Kiswahili

Zaburi 29

Mwito wa Kuabudu na Kumpa Mungu Utukufu 1–2

1
Zaburi ya Daudi. Mpeni Bwana, enyi mashujaa, mpeni Bwana utukufu na nguvu.
2
Mpeni Bwana utukufu unaostahili jina lake; mwabuduni Bwana katika uzuri wa utakatifu wake.

Sauti ya Bwana Katika Dhoruba 3–9

3
Sauti ya Bwana iko juu ya maji; Mungu wa utukufu hupiga radi, Bwana hupiga radi juu ya maji makuu.
4
Sauti ya Bwana ina nguvu; sauti ya Bwana ni tukufu.
5
Sauti ya Bwana huvunja mierezi; Bwana huvunja vipande vipande mierezi ya Lebanoni.
6
Hufanya Lebanoni irukaruke kama ndama, Sirioni urukaruke kama mwana nyati.
7
Sauti ya Bwana hupiga kwa miali ya umeme wa radi.
8
Sauti ya Bwana hutikisa jangwa; Bwana hutikisa Jangwa la Kadeshi.
9
Sauti ya Bwana huzalisha ayala, na huuacha msitu wazi. Hekaluni mwake wote wasema, “Utukufu!”

Utawala wa Milele na Baraka za Mungu 10–11

10
Bwana huketi akiwa ametawazwa juu ya gharika; Bwana ametawazwa kuwa Mfalme milele.
11
Bwana huwapa watu wake nguvu; Bwana huwabariki watu wake kwa kuwapa amani.

Maandiko ya Biblia: Biblica® Open Kiswahili Contemporary Version (Neno: Bibilia Takatifu)™, © 1984, 1989, 2009, 2015 Biblica, Inc. · CC BY-SA 4.0“Biblica” is a trademark registered in the United States Patent and Trademark Office by Biblica, Inc., used with permission.