תיאור המדכא הרשע

תְהִלִּים י׳:ב׳-י״א

ב׳

בגאות רשע ידלק עני יתפשו במזמות זו חשבו׃

ג׳

כי הלל רשע על תאות נפשו ובצע ברך נאץ יהוה׃

ד׳

רשע כגבה אפו בל ידרש אין אלהים כל מזמותיו׃

ה׳

יחילו דרכו בכל עת מרום משפטיך מנגדו כל צורריו יפיח בהם׃

ו׳

אמר בלבו בל אמוט לדר ודר אשר לא ברע׃

ז׳

אלה פיהו מלא ומרמות ותך תחת לשונו עמל ואון׃

ח׳

ישב במארב חצרים במסתרים יהרג נקי עיניו לחלכה יצפנו׃

ט׳

יארב במסתר כאריה בסכה יארב לחטוף עני יחטף עני במשכו ברשתו׃

י׳

ודכה ישח ונפל בעצומיו חלכאים׃

י״א

אמר בלבו שכח אל הסתיר פניו בל ראה לנצח׃