פרשת המקלל

וַיִּקְרָא כ״ד:י׳-ט״ז

י׳

ויצא בן אשה ישראלית והוא בן איש מצרי בתוך בני ישראל וינצו במחנה בן הישראלית ואיש הישראלי׃

י״א

ויקב בן האשה הישראלית את השם ויקלל ויביאו אתו אל משה ושם אמו שלמית בת דברי למטה דן׃

י״ב

ויניחהו במשמר לפרש להם על פי יהוה׃

י״ג

וידבר יהוה אל משה לאמר׃

י״ד

הוצא את המקלל אל מחוץ למחנה וסמכו כל השמעים את ידיהם על ראשו ורגמו אתו כל העדה׃

ט״ו

ואל בני ישראל תדבר לאמר איש איש כי יקלל אלהיו ונשא חטאו׃

ט״ז

ונקב שם יהוה מות יומת רגום ירגמו בו כל העדה כגר כאזרח בנקבו שם יומת׃