TRV
יְחֶזְקֵאל י׳:א׳-ז׳
א׳
¶ ואראה והנה אל הרקיע אשר על ראש הכרבים כאבן ספיר כמראה דמות כסא נראה עליהם׃
ב׳
ויאמר אל האיש לבש הבדים ויאמר בא אל בינות לגלגל אל תחת לכרוב ומלא חפניך גחלי אש מבינות לכרבים וזרק על העיר ויבא לעיני׃
ג׳
והכרבים עמדים מימין לבית בבאו האיש והענן מלא את החצר הפנימית׃
ד׳
וירם כבוד יהוה מעל הכרוב על מפתן הבית וימלא הבית את הענן והחצר מלאה את נגה כבוד יהוה׃
ה׳
וקול כנפי הכרובים נשמע עד החצר החיצנה כקול אל שדי בדברו׃
ו׳
ויהי בצותו את האיש לבש הבדים לאמר קח אש מבינות לגלגל מבינות לכרובים ויבא ויעמד אצל האופן׃
ז׳
וישלח הכרוב את ידו מבינות לכרובים אל האש אשר בינות הכרבים וישא ויתן אל חפני לבש הבדים ויקח ויצא׃
Settings