TRV
שְׁמֹות ח׳:א׳-י׳
א׳
¶ ויאמר יהוה אל משה בא אל פרעה ואמרת אליו כה אמר יהוה שלח את עמי ויעבדני׃
ב׳
ואם מאן אתה לשלח הנה אנכי נגף את כל גבולך בצפרדעים׃
ג׳
ושרץ היאר צפרדעים ועלו ובאו בביתך ובחדר משכבך ועל מטתך ובבית עבדיך ובעמך ובתנוריך ובמשארותיך׃
ד׳
ובכה ובעמך ובכל עבדיך יעלו הצפרדעים׃
ה׳
ויאמר יהוה אל משה אמר אל אהרן נטה את ידך במטך על הנהרת על היארים ועל האגמים והעל את הצפרדעים על ארץ מצרים׃
ו׳
ויט אהרן את ידו על מימי מצרים ותעל הצפרדע ותכס את ארץ מצרים׃
ז׳
ויעשו כן החרטמים בלטיהם ויעלו את הצפרדעים על ארץ מצרים׃
ח׳
ויקרא פרעה למשה ולאהרן ויאמר העתירו אל יהוה ויסר הצפרדעים ממני ומעמי ואשלחה את העם ויזבחו ליהוה׃
ט׳
ויאמר משה לפרעה התפאר עלי למתי אעתיר לך ולעבדיך ולעמך להכרית הצפרדעים ממך ומבתיך רק ביאר תשארנה׃
י׳
ויאמר למחר ויאמר כדברך למען תדע כי אין כיהוה אלהינו׃
Settings