המכסה החיצוני מעורות עיזים

שְׁמֹות כ״ו:ז׳-י״ד

ז׳

ועשית יריעת עזים לאהל על המשכן עשתי עשרה יריעת תעשה אתם׃

ח׳

ארך היריעה האחת שלשים באמה ורחב ארבע באמה היריעה האחת מדה אחת לעשתי עשרה יריעת׃

ט׳

וחברת את חמש היריעת לבד ואת שש היריעת לבד וכפלת את היריעה הששית אל מול פני האהל׃

י׳

ועשית חמשים ללאת על שפת היריעה האחת הקיצנה בחברת וחמשים ללאת על שפת היריעה החברת השנית׃

י״א

ועשית קרסי נחשת חמשים והבאת את הקרסים בללאת וחברת את האהל והיה אחד׃

י״ב

וסרח העדף ביריעת האהל חצי היריעה העדפת תסרח על אחרי המשכן׃

י״ג

והאמה מזה והאמה מזה בעדף בארך יריעת האהל יהיה סרוח על צדי המשכן מזה ומזה לכסתו׃

י״ד

ועשית מכסה לאהל ערת אילם מאדמים ומכסה ערת תחשים מלמעלה׃