דְּבָרִים ח׳:י״א-י״ח

י״א

השמר לך פן תשכח את יהוה אלהיך לבלתי שמר מצותיו ומשפטיו וחקתיו אשר אנכי מצוך היום׃

י״ב

פן תאכל ושבעת ובתים טובים תבנה וישבת׃

י״ג

ובקרך וצאנך ירבין וכסף וזהב ירבה לך וכל אשר לך ירבה׃

י״ד

ורם לבבך ושכחת את יהוה אלהיך המוציאך מארץ מצרים מבית עבדים׃

ט״ו

המוליכך במדבר הגדל והנורא נחש שרף ועקרב וצמאון אשר אין מים המוציא לך מים מצור החלמיש׃

ט״ז

המאכלך מן במדבר אשר לא ידעון אבתיך למען ענתך ולמען נסתך להיטבך באחריתך׃

י״ז

ואמרת בלבבך כחי ועצם ידי עשה לי את החיל הזה׃

י״ח

וזכרת את יהוה אלהיך כי הוא הנתן לך כח לעשות חיל למען הקים את בריתו אשר נשבע לאבתיך כיום הזה׃