דְּבָרִים כ״ח:כ״א-כ״ו

כ״א

ידבק יהוה בך את הדבר עד כלתו אתך מעל האדמה אשר אתה בא שמה לרשתה׃

כ״ב

יככה יהוה בשחפת ובקדחת ובדלקת ובחרחר ובחרב ובשדפון ובירקון ורדפוך עד אבדך׃

כ״ג

והיו שמיך אשר על ראשך נחשת והארץ אשר תחתיך ברזל׃

כ״ד

יתן יהוה את מטר ארצך אבק ועפר מן השמים ירד עליך עד השמדך׃

כ״ה

יתנך יהוה נגף לפני איביך בדרך אחד תצא אליו ובשבעה דרכים תנוס לפניו והיית לזעוה לכל ממלכות הארץ׃

כ״ו

והיתה נבלתך למאכל לכל עוף השמים ולבהמת הארץ ואין מחריד׃