אִרְגּוּן מֵחָדָשׁ שֶׁל עֲבוֹדַת הַלְוִיִּם

1 דִּבְרֵי הַיָּמִים כ״ג:כ״ד-ל״ב

כ״ד

אלה בני לוי לבית אבתיהם ראשי האבות לפקודיהם במספר שמות לגלגלתם עשה המלאכה לעבדת בית יהוה מבן עשרים שנה ומעלה׃

כ״ה

כי אמר דויד הניח יהוה אלהי ישראל לעמו וישכן בירושלם עד לעולם׃

כ״ו

וגם ללוים אין לשאת את המשכן ואת כל כליו לעבדתו׃

כ״ז

כי בדברי דויד האחרנים המה מספר בני לוי מבן עשרים שנה ולמעלה׃

כ״ח

כי מעמדם ליד בני אהרן לעבדת בית יהוה על החצרות ועל הלשכות ועל טהרת לכל קדש ומעשה עבדת בית האלהים׃

כ״ט

וללחם המערכת ולסלת למנחה ולרקיקי המצות ולמחבת ולמרבכת ולכל משורה ומדה׃

ל׳

ולעמד בבקר בבקר להדות ולהלל ליהוה וכן לערב׃

ל״א

ולכל העלות עלות ליהוה לשבתות לחדשים ולמעדים במספר כמשפט עליהם תמיד לפני יהוה׃

ל״ב

ושמרו את משמרת אהל מועד ואת משמרת הקדש ומשמרת בני אהרן אחיהם לעבדת בית יהוה׃