1 דִּבְרֵי הַיָּמִים י׳:ו׳-י״ד
ו׳
וימת שאול ושלשת בניו וכל ביתו יחדו מתו׃
ז׳
ויראו כל איש ישראל אשר בעמק כי נסו וכי מתו שאול ובניו ויעזבו עריהם וינסו ויבאו פלשתים וישבו בהם׃
ח׳
ויהי ממחרת ויבאו פלשתים לפשט את החללים וימצאו את שאול ואת בניו נפלים בהר גלבע׃
ט׳
ויפשיטהו וישאו את ראשו ואת כליו וישלחו בארץ פלשתים סביב לבשר את עצביהם ואת העם׃
י׳
וישימו את כליו בית אלהיהם ואת גלגלתו תקעו בית דגון׃
י״א
וישמעו כל יביש גלעד את כל אשר עשו פלשתים לשאול׃
י״ב
ויקומו כל איש חיל וישאו את גופת שאול ואת גופת בניו ויביאום יבישה ויקברו את עצמותיהם תחת האלה ביבש ויצומו שבעת ימים׃
י״ג
וימת שאול במעלו אשר מעל ביהוה על דבר יהוה אשר לא שמר וגם לשאול באוב לדרוש׃
י״ד
ולא דרש ביהוה וימיתהו ויסב את המלוכה לדויד בן ישי׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל
Settings