Zabura 121
Mahajjaci Ya Daga Idonsa Sama 1–2
1
Waƙar haurawa. Na tā da idanuna zuwa wajen tuddai, ta ina ne taimakona zai zo?
2
Taimakona zai zo daga wurin Ubangiji, wanda ya kafa sama da ƙasa.
Mai Tsaro da Ba Ya Barci 3–6
3
Ba zai bari ƙafarka tă yi santsi ba, shi da yake tsaronka ba zai yi gyangyaɗi ba;
4
tabbatacce, shi da yake tsaron Isra’ila ba ya gyangyaɗi ko barci.
5
Ubangiji yana tsaronka, Ubangiji ne inuwa a hannun damanka;
6
rana ba za tă buge ka cikin yini ba balle wata da dare.
Kiyaye Madawwami Mai Cikakken 7–8
7
Ubangiji zai kiyaye ka daga dukan masifa, zai tsare ranka;
8
Ubangiji zai kiyaye shigarka da fitarka yanzu da har abada kuma.
Rubutun Littafi Mai Tsarki: Biblica® Open Hausa Contemporary Bible™, © 2009, 2020 Biblica, Inc. · CC BY-SA 4.0“Biblica” is a trademark registered in the United States Patent and Trademark Office by Biblica, Inc., used with permission.
Study note