Zabura 102:23-28

Cikin rayuwata, ya karye ƙarfina; ya gajartar da kwanakina.

Sai na ce, “Kada ka ɗauke ni a tsakiyar kwanakina, ya Allah; shekarunka suna bi cikin dukan zamanai.

A farkon fari ka kafa tushen duniya, sammai kuma aikin hannuwanka ne.

Za su hallaka, amma za ka ci gaba; duk za su tsufe kamar riga. Kamar riga za ka canja su za a kuwa zubar da su.

Amma kana nan yadda kake, kuma shekarunka ba za su taɓa ƙarewa ba.

’Ya’yan bayinka za su zauna a gabanka; zuriyarsu za su kahu a gabanka.”